Ботакөз Сәрсенбаева: Командамыз толық әлеуетін көрсете алмады

Бөтакөз Сәрсенбаева "Алтай-2" командасының белді ойыншысы. Бүгінгі таңда өз ойын өрнегімен талайды тамсандырып жүрген волейболшымен Prosports.kz тілшісі сұхбаттасты. 

- Ботакөз, ел біріншілігі мәресіне жетті. Плей-офф кезеңіне шығып, жүлдеге таластыңдар. Алайда үштікке іліне алмадыңдар. Командаға не жетіспеді деп ойлайсың?

- Қарсыластарымыз осал болған жоқ. оларға қарсы толық әлеуетімізді көрсете алмадық, көп нәрсе біз ойлағандай болмады. Сол үшін жанкүйерлерден кешірім сұраймын.

-Керісінше "Алтай-1" командасы төртінші мәрте қатарынан ел чемпионы болды. Сыры неде?

- Команданың бірлігі, жеңіске деген құштарлығы, чемпиондықты қорғап қалу мақсатында аянып қалмаулары оларға жеңіс әкелді деп есептеймін.

- Бір уақытта сен сол командада ойнадың, қазір екінші құрамында жүрсің. Ботакөзді "Алтай-1" сапынан қайта қашан көреміз?

- Басшылық қалай шешсе, солай болады. Әзірге менің екінші командаға көмегім тиіп жатыр деп ойлаймын.

- Cенің пікірінше Қазақстанның ең үздік волейболшысы кім?

- Сөссіз -Сана Анарқұлова. Оның командаға қосып жүрген үлесі зор. Нағыз лидер ойыншы.

-Ботакөздің ойынына тәнті болып жүрген ер азаматтар көп пе?

- Маған әлеуметтік желі арқылы жазатындарды ескерсек, баршылық. Кейбірі ойыныма жоғарғы баға береді, кейбірі ғашықтық сезімдерін білдіріп жатады. Бәріне тек алғыс айтамын.

- Қазақ ер азаматтарының бойындағы қандай қасиеттерді бағалайсың?

-Интеллигенттік, тәрбие көрген, алға қойған мақсаты айқын, ер мінезді, әзілқой азаматтар ұнайды.

- Алға қойған мақсаттарың қандай?

-Әрине, үлкен жеңістерге жетуді көздеймін. 

- Сауалдарға жауап бергенің үшін рахмет. Алаңда тек сәттілік тілеймін!